صوت الصورة

يا ونّتي ونّت المصدوم
موتره عدمٍ .. وتلفاني
الجو ما طر وفيه أغيوم
والكل زحلف على الثاني
مواتر الأمس غير اليوم
حديد صافي .. وصنياني
عبدالكريم عبدالرحمن السلّوم - القرائن
نتايج التفحيط صارت كثيرات
لازم حلولٍ عاجلة لا تغفلون
في كل يومٍ نسمع أموات وأموات
يا للأسف يا للأسف كيف ترضون
هذي سلومٍ يا جماعه خطيرات
والحل منكم يا هل العرف تكفون
لازم رقابة صارمة كل لحظات
نوقف شبابٍ طايشٍ كيف تنهون
محمد عبدالعزيز الخنيفر - أشيقر
في كلِّ لحظه نسمع أسره ناعيه
تبكي على اللي راح في طرفة بصر
هذا معاقٍ له دموعِ جاريه
وهذا مصاب وذاك روحه في خطر
وكم طفلِ ودَّع له قلوبٍ حانيه
وكم أسرةٍ صارت بعد عينٍ أثر
ما هو سبب غارة جيوشٍ غازيه
ولا هو مرض أضفى على الأمه كدر
حوادثٍ في كلِّ حِينِ وثانيه
أسباب سرعه أو تهاون من بشر
ناصر جمعان آل عوض - وادي الدواسر
شبابنا يحتاج نصحٍ وتوجيه
وين العقل يا هل العقول الرزينه؟
صار التهوّر عندهم فيه ترفيه
يقول أنا بطران يا قوّ عينه
يحب يسرع عسى الله يهديه
شوفوا عواقبها المواتر عجينه
عبدالعزيز الصالح - القصب
العاقل اللي ماسك الدرب مذهول
أسبابه مفحط على الخط مخفوف
ترى الفعل يا ناس ما هو بمعقول
وهذا سقيم العقل وبالجن موصوف
من يوقف المخطي وأنا أقول ياحول
كم عاقلٍ يمشي من الخوف مرجوف
كم من فقيدٍ راح وكم فيه مشلول
واللي تسبب صار بالسجن موقوف
ريان محمد الخنيفر - الرياض
ترى الحوادث يا جماعة لها أسباب
وأكبر سبب يا ناس والله سايق
يمكن تكون أجواء فحذرٍ يالاحباب
والا طريقٍ كل دربه عوايق
والمركبة أحسب حسابك لها حساب
والسرعة اللي أعدمت هالخلايق
هذي الضحايا بين ميت ومنصاب
والصدر يا عالم بها اليوم ضايق
عثمان إبراهيم الرشيد - الرياض
كثرت حوادثنا وزدنا وَفَيَات
معلمات الجيل أعلا نسبها
من الرياض معينه في القريات
ومن الشمال معينه وسط أبها
لابد من حلٍ تقرَّه دراسات
يعالج الأسباب ويحد منها
عبداللطيف الحُمَيَّانِي - عنيزة
السرعه اللي مالها طب .. وعلاج
صارت سبب في موت نصف الخليقه
شبابنا اللي سببوا زود الإحراج
بأفعالهم صدر الأهل فيه ضيقه
لا من ركب موتر يكيم إلى الصاج
على الطريق وما يبي شي يعيقه
يالله يا مجري على البحر الأمواج
تلطف بنا في كل لحظه ودقيقه
خالد ناصر المخيمر - روضة سدير
صدمة الموتر عطت أوضح جواب
إن بالسرعة مكامين الخطر
مِقدَمْ الموتر وسطحه أو معه باب
عن باقي الموتر تقطّع شطر
به ملفاتٍ.. أو مطباتٍ.. أو ضباب
وبه أمورٍ ما على البال اتخطر
مع التمهّل ينحسب لها حساب
وما بقى على من للسما فطر
سعود عائش الحربي - جدة
شوف الحوادث يفزع القلب افزاع
والبعض منها والله إنه يروعي
ومن شاهد الصورة ترى قلبه ارتاع
عزّي لمنهو يا جماعه جزوعي
ارواح راحت مالها ذنب في ساع
والله ما نحصي عددها سبوعي
نحتاج حلٍ يحسم الوضع بإسراع
وياللي تهوّر شوف عد الفجوعي
حمد عبدالله الوايلي - حوطة سدير
بشّر عسى ما جا هل الفرد إصابات
واللي على التنده قفز كنه الطير
ياهل التهوّر من سببكم وفيات
لا تزهق أرواحٍ إذا صرت في السير
راع المشاعر مع جميع المسارات
الدرب ما هو لك بصكٍ عن الغير
سعود عبدالعزيز الهزاع - نعام
صورة العدد السابق