الحياة دروس وأحزان وأفراح

اسمع كلامي لا تقول أنت فاهم
ترى الحياة دروس وأحزان وأفراح
حافظ على دينك وبالخير ساهم
خلك لفعل الخير مرشد ونصّاح
احفظ صلاتك قبل موتك يداهم
طيع الولي في كل حزة وترتاح
والوالدين أحرص ودور رضاهم
لا تنتظر تبّر أحدهم ليا طاح
وجنب عن اللي قاصراتٍ يداهم
خويهم ما يسمعونه ليا صاح
الرفقة اللي ما تجي بالتفاهم
إلا على مبدأ المصالح والأرباح
لا صار عندك مال تكسب رضاهم
وإن قل مالك مالقوا فيك مصلاح
الضيف ما يهنى بلقمة عشاهم
ولا للطراقي عندهم حق ومراح
دايم على الغرات تاقع خطاهم
ومن يتبع الغرات للسر فضاح
تعجز تميز مرهم من حلاهم
ينسونك الغلطات من كثر الالحاح
أقطع علاقتهم وفارق أذاهم
ترى مجالسهم على الشر فتّاح
خلك مع اللي تستريح بلقاهم
لاجيته مهموم روحت مرتاح
ربعٍ يشرف فعلهم من لفاهم
بيض الوجيه مزبنة كل صيّاح
ربي على فعل المكارم هداهم
على طريق الخير ممسا ومسراح
فكر بعقلك لا تقول أنت واهم
ترى الحياة دروس واحزان وافراح
عبدالله مرزوق المرشدي