البر متعة والعمر ما يدومي

ما يشرح الخاطر ويبعد همومي
إلا الخلا ومرافقة كل دندون
أحب شوف البر لو ربع يومي
كني بشوفه مالكٍ مال قارون
البر متعة والعمر ما يدومي
والوقت ما يصفى على ما يقولون
خلوني ادله في طويل الرجومي
وانسى شقى نفسي وما كان مكنون
ما لي بجو الدار لا احدٍ يلومي
شوف الخلا ما له مثيلٍ ولا لون
فيه انشراح البال واجمل حلومي
جوه يخلي القلب سالي وممنون
مع شبت للنار باعلى الحزومي
وادلال رسلانٍ بها البن موزون
فنجالها له لذةٍ ومحكومي
من دلةٍ تبعد عنا كل مشحون
نواف بن محمد الصخابرة