اجرك تناله من المعبود

ياسالم البشري البيطار
سلام حشمه لكم مردود
اليوم حاير وابا استفسار
من علم مثل الليالي السود
القلب كاتب علينا اقرار
من جذ حبله جنا المنقود
واليوم أشوف البنا ينهار
وعند الجزا للمآسي زود
سالم البشري
يامرحبا نفرش الأزهار
في دربكم ياعميل الجود
ياعارف العلم يامحتار
قلّي وبابذل لك المجهود
مايلام من يدرق الأخطار
ويحذر اللي هناك قعود
واللي بنى عارف المعمار
مايروح فيه الوفا موجود
فواز الزويهري :
عسى البقا واسمع اللي صار
ياللي لكم فالمعاني فود
اقلوب فيها الحسد والنار
غطت على باذل المجهود
والصافيه أصبحت فاكدار
والظن بادي على المورود
حاولت أدور بصيص أعذار
عجزت للقا لهم مقصود
سالم البشري:
ادعي لهم ربك الستار
يمكن ربيع القلوب يعود
واجب لهم تلفت الأنظار
وتفتح لهم بابها المسدود
بالطيب لاتعدم الأفكار
حتى الصفا فالنفوس يسود
ولا ابتعد واطلق الإنذار
وأجرك تناله من المعبود