كذب عليّ

تعال يا جرحي و فرحي و دنياي
ليت الاماني لو تغيّر قرارك
كذب عليّ و قول لي بالوعد جاي
يكفي علي ساعة فرح بإنتظارك
ان كان صدقك آخره جاب فرقاي
كذب عسى ربي بكذبك يبارك
ما همّني من قال لي داي برداي
ما لامني لو هو بقلبي مشارك
ما لك علي الا اكمل خطاياي
اجمل خطا اللي يجي بإختارك
خالفت لأجلك من يعلمني الراي
و طاوعت قلبٍ ما تهنا بجوارك
اصعب من رجوعي عن الدرب شكواي
لوني جريح و باقية لي معارك
جيتك و انا ما جيت غيرك من اقصاي
عساك تجبر خاطري بإنكسارك
كل شي يبعدنا أشوفه من أعداي
حتى الجدار اللي على حدود دارك
لو نسأل الدنيا متى يفرح الناي
قالت حبيبك هو تكرم و زارك ..