شعور المحبة

ان اتصالك مطر وايام عمري جفاف
غيمة وهلت مطرها واصحت بروقها
في ليلة كنها دهر وسنين عجاف
مسجون فيها وعيني يحترق موقها
وحيد .. مالي سواحل ما لحلمي ضفاف
وخطاي ملت وكبدي ما برد شوقها
يا بنت واللي خلق فيك الدلع والعفاف
واعطاك ظل النخيل وحالي عذوقها
ما غبت لاجل اختلق دمعة واسبب خلاف
واجرح شعور المحبة واكسب عقوقها
لكن الاقدار صلفة والليالي صلاف
مثلي تلزم عباد الله من حلوقها
يا بنت والعذر وافي والنوايا نظاف
والشمس تغرب ويرجع دافي شروقها
قولي كتب فيك عبدالله قصيده وشاف
معادن الشوق ما بارت بصندوقها
يالوردة اللي دلعها ما عليه اختلاف
والطفلة اللي يشاف الدم بعروقها
لا انتي بعيدة ولا صمتي نهاية مطاف
ولا عيونك تذوق البعد ويذوقها
ارخي هدبك وخذيني لك فراش ولحاف
وارمي بجهد السنين وهاتي فتوقها
وانا علي احترق لاجلك قصيدة وقاف
وامطر بغيم القوافي واشعل بروقها