الزمان العجيب

يا قلب ليش العجب طبع الزمان العجيب
يقرّبك في ذهاب ويبعدك في إياب
لكن تعجب ب كيفك في البعيد القريب
اللي ليا زاد همك له تحث الركاب
اللي حسبته طبيب وخان دور الطبيب
لا جيته بجرح زاد الجرح وأقفا وغاب
والمشكله في غيابه ل رجع وش يجيب؟!
ما جاب غير الجروح اللي برت بالغياب
للحين تضمى لوصله وإنت مالك نصيب؟!
متى تتوب وتعرف إن الضما لك يعاب
ماهو غريب الضما للوصل بس الغريب
إنك على ه الضما لا زلت ترجي سراب
أعياك كثر التعب وأرداك زود النحيب
وأنا سئمت الحياه اللي ملتني عذاب
يا قلب ناده وإذا ناديت علّه يجيب
ثم بلغه كلمتين ودمعتين وعتاب
قلّه تراك الحبيب اللي ذبحت الحبيب
اللي عطاك الفرح وأعطيته الاكتئاب
وتبقى الحبيب المقدس والبعيد القريب
إلين يحثى علي في القبر بعض التراب