لاجل الوطن ناقف على كل مرصاد

لأنه يمثل موعد حاسبينه
يوم مجيد وكنه أيام الأعياد
تاريخ توحيد الوطن حافظينه
حيث ان له ذكرى مجيده وميعاد
في ظل حامين الحرم والمدينه
آل السعود اللي لهم صيت وامجاد
أهل العقول النيّره والرزينه
حكّامنا اللي للوطن خير قيّاد
هم ذخر من ثبت شراع السفينه
عبدالعزيز اللي بناها بالاوتاد
وأرسى دعايمها بعزم وفطينه
قدّام حكمه حكم الاشرار مافاد
غير الحسد ومنازعات الضغينه
حتى قدم ثم قال مافيه معواد
والله هو اللي منهجه سالكينه
نبي نشتت حكم موشية الاحقاد
وحكماً على غير العداله غبينه
هجم ظلام الليل والصبح ما قاد
والسيف الأجرد يشهره في يمينه
والنصر تم وقدر الله ماراد
ونادى المنادي عقب ماردّ دينه
الحكم لله ثم شجعان الأولاد
اللي ذممهم بالأمانه حصينه
وحنا سعوديين والحظ منقاد
وحب الوطن بقلوبنا غارسينه
نمشي على نهج الشريعه والارشاد
درباً عطوه اسلافنا تابعينه
واليوم امان وعز والخير يزداد
رغماً على اللي عزنا حاسدينه
لاجل الوطن ناقف على كل مرصاد
ومن دونه نشكل حصوناً مكينه
عبدالله بن جهز العتيبي