تحت الأنقاض!!

قلت أتخير كل طيب واغنيه
الشعر يا أهل الشعر له عدة أغراض
والشعر ياشعار ما أكثر معانيه
قالوا تغزل قلت فاض الشعر فاض
شعر الغزل يفز قلبي لطاريه
شعرٍ ترا طيب ولامس الأعراض
أنا أشهد إنه يطرب اللي يغنيه
هاضت مشاعر شاعرٍ هاجسه هاض
والقاف لامنه طرى له يسويه
ويا حبي اللي عايش بين الأنقاض
متى قصور الحب ترجع مبانيه
أجيه كلي شوق يجزأ بالأعراض
وأزعل عليه وبعد ساعات أراضيه
أنا الذي من سبته شفت الأمراض
وأنا الذي حبه عن الناس مخفيه
أبو عيونٍ كنها تغمض إغماض
زادت على قلب المعنى بلاويه
وخده كما سحابةٍ برقها ناض
نوره يتل القلب بأقصى عراويه
أنا أشهد ان الشعر للزين فياض
اللي إله الكون بالحسن معطيه
دكتور قلبي لو وصفتلك الأعراض
عساك يادكتور جرحي تداويه
حبه بوسط القلب حاضر وله ماض
لو قلت لي تنساه مانيب بناسيه
وحبه بوسط القلب واحات ورياض
وإن غاب حبه ضاميات سوانيه
لو دونه الموت الحمر نارد حياض
لاجله جميع الكون يرخص لغاليه
سعد بن سرور
الدوادمي