هاض الفؤاد

واسترسله بالدمع عين حزينه
والقلب يوم شاف خله وراعاه
كثرت هواجيسه وبيّح كنينه
وفز وكسر بالصدر باقي حناياه
شفق على خله وشوفة ظنينه
هاذي سوايا القلب هاذي سواياه
ما طاعكم بالقول ياناصحينه
كم واحد في الحب سارت مطاياه
أحد يسار الدرب واحد يمينه
واحد عنان القلب في وسط يمناه
متمكن يقوى عليه ويهينه
لاشك قلبي ماهقيت إني أقواه
بين الرجا والياس ضيع سنينه
يركض ورى شخص هجره وتناساه
يطرد سراب ما تطوله يدينه
الصاحب اللي كن طلعة محياه
بدر كمل في عالي الكون زينه
يجبر ثقيل العقل بالمشي يتلاه
ويرسل سهام الموت من رمش عينه
وأنا صويب الخد والعنق وشفاه
وليل تلاعب فوق غرة جبينه
دفنت جرحي خايف الناس تلقاه
بس فضحت جرحي عيون حزينه
دفين الجرح
عودة سدير