الطرف اللعوب

ما أنت قد الطيش يا الطرف اللعوب..
نظرتك غيري تراه أولى بها
حسنك اللي كل من شافه يذوب
تذبحه سودك وكحل أهدابها
بس يمي لا تقرب يا كذوب
ابعد وعينك كثير أحبابها..
والله إني ضايقٍ من كل صوب
والليالي ما حسبت حسابها
ضيقة بي لابستني لبس ثوب
لا انتهى فيها الكلام أبدابها
إيه يا سود النوايا والقلوب
والأوادم ما تكف عتابها
لو يبدين الخلق ما هب الهبوب
والخوافي ما أحدٍ يدرابها
وش يضر نفوسهم لو هي تتوب
عن ذنوبٍ ما عرفت أسبابها
ما أحدٍ يجبر على فعل الذنوب
والقلوب الميته ترضابها
وإنت يا قلبي ترى ما أنت مغصوب
الحرار تعيش فوق هضابها
ضيقوا فيك المناحي والدروب
والفجوج وساع يا طلابها
عاد لا غالب ولا انت مغلوب
ولا أنت ملزوم بكسب إعجابها
وانت يا طيشٍ سكن طرف لعوب
ابعد وعينك كثير أحبابها