جيش المشاريه

منهو يبيع القلب والقلب شاريه
خله يروح وضيقة الصدر تنزاح
من يتبع المقفين زاد الكدر فيه
يمشي على عكس اتجاهات الأرياح
يا صاح ما ينفعك جيش المشاريه
باللي خذلك وحط في ظهرك رماح
لا ترتجي لو طعتني مد أياديه
واصحى تقول إنه يجي عقب ما راح
صدر اللئيم.. الغش والحقد ماليه
وصدر الكريم بصادق الود فوَّاح
هذا على درب الردى لا تخاويه
وهذا على درب النقى فيك نصَّاح
يا ما تشوف من البشر في مماشيه
مظهر ولا تلقى المخابر اذا لاح
احدٍ على جرحك طبيب يداويه
واحدٍ على جرحك يغني ومرتاح
أحدٍ علاج الروح يومك تلاقيه
وأحدٍ يغث الروح ويزيدك اجراح
احرص على خوة هل الكار ياهيه
اللي مجالسهم بها العز ملواح
ان جيتهم في وقت عسره لياليه
تضوي بطيب أفعالهم كل الأرواح