صرت القويّة

وانا التي من قسوّ الأيام ما نمت
يا حاسدي لا تفرح بهم فيّه
أنا من هموم الليالي تعلمت
يذكر زمانٍ به ظروفي عتيّه
يومي غريبه واشكي النوح للصمت
يحسب لي الهفوات كيّه بكيّه
يفرح إلى مني شكيت وتألمت
والحين يسأل بعد ضعف البنيّه
وش بي على حرب المواجع تولمت!
يا حاسدي مهما تمادت عليّه
موجه أكابدها وموجه بها عمت
رغم القصور اللي تعاني يديّه
الا اني ارفع هامتي لا تكلمت
ورغم الحروق اللي بقلبي مضيّه
الا اني اشفي علتي لا تبسمت
سيوف الألم مع قوّ صبري رخيّه
وأنا على شمس القوايل تنعمت
عرفت منهو كاد لي سوء نيّه
وعرفت أنا الصاحب لقدره تفهمت
وصرت أتوقى النار واجعل شظيّه
يزيدني عزٍ على عز لا شمت
وما راح اجازي كل سيّه بسيّه
ماني من اللي يضاعف الشر لا قمت
ما قلت لك لا تفرح بهمّ فيّه
ولا تبشر بضعفي إلى مني اهزمت
أنا كواني الهم وصرت القويّه
وأنا من هموم الليالي تعلمت
أغراب