في غيبتك

من وين ما وجه تجيني جماعه
أسج مع ذكرى هكا الباب والدار
والشارع اللي فيه قلبي وداعه
لا قلت الحيله وشحن الأخبار
هاجوس فكري قام يكفخ شراعه
القا بهاجوسي دواء الفكر لاثار
وأقضي معه ساعات ما هي بساعه
يا صاحبي طالت بك أيام الأسفار
ولا عاد به صوت نحب استماعه
من يوم ما ودعت ما تدري اشصار
بالخافق اللي قل لاماك لاعه
عايش وحيد وضيقتبي هالاسوار
صارت حياتي من كدر في جزاعه
يا ليتها تسرع بلاماك الأقدار
قدام ما يعلن خفوقي ضياعه
صاحبك من فرقاك ضايع ومنهار
والعمر من دونك بليا سناعه
ودعت معك الروح والقلب وأسرار
هاك السنين اللي مضت بنهزاعه
سفرك بين لي من الحب مقدار
من قربك إني ما هقيت القناعه
ويا صاحبي صاحبك شاعر ومغوار
لكن سلم لك من الحب طاعه
عود ترى الوحدة تبي صبر صبّار
وأنا ترى مالي عليه استطاعه
مفلح بن غالب المريبيط - عنيزة