الحظ

سر يا قلم وأبدع لنا زين الأمثال
ومثل على بيض الورق خير تمثيل
واحكم فريد القاف من قبل ينقال
عشان يحفظ لا اسمعته المشاكيل
هات النوادر واترك البيت يختال
ويجمح على كل المسامع كما الخيل
ما دامت انك (كفو) للجزل تشتال
أبا اتعبك يا القرم في كايد الشيل
واليا عسرك الوقت لا تشكي الحال
ما يشكي الا بارد الجاش والحيل
إلا لعلام الخفايا والأحوال
مولج سنام الصبح مع آخر الليل
ما ضاقت الدنيا على شان رجال
لكن تضيق صدور بعض الرياجيل
ومن علق الآمال مع طاير الفال
كل الليالي في حرى طايره حيل
الخط (خرج) وصاحبه وصف جمَّال
لا حال بإذن الله ترا فاله يحيل
رزق البنادم يلتقي معه لو طال
مذكور فالقرآن وكتاب الإنجيل
ويوم الذويبي راعي السالفة قال
أشوف رزقي فالليال المقابيل
ماقال حظي يا ملا راح واحتال
عنَّز على اللي ما خفته الغرابيل
وختامها عداد ما هل همال
على النبي صلوا وزيدوا تهاليل