طاروق الشعر

واحس شبت في ضميري حرايق
يا ليت طاروق الشعر له دعاني
كود اني اهرج من ضميري حقايق
حيث ان خلي بالضماير كواني
ويلي على حالي غديت متضايق
يا ليت خلي ما عرفته وجاني
ما دام صارت بالمواصل عوايق
ما دام خلي بالهجر قد نواني
وانا مع المجمول مالي طرايق
اعيش في ذكرى الهنا والتهاني
يوم ان قلبي في هوى الخل رايق
ما عاد ابي غيره من الناس ثاني
اعيش في فكره وفيّ غير بايق
كود انها ترجع مياه السواني
من عقبها تنبت زهور الحدايق
سبحان ربي بأمره الكل فاني
يحيي غصون ميتةْ في دقايق
الواحد المعبود مجري الزماني
مرسل رسول الله لكل الخلايق
هاني بن محمد السلوم /شقراء