نسيت

جيتك ندم كلي من أقصاي ل.. أقصاي
أدري غلطت وغلطتي حيل مُره
جيتك أسوق من الخجل باقي خطاي
متلبسٍ ثوب الخطأ ألف مره
نسيت..!! سامحني ولا تفرح عداي
اللي يبوني بالعنا والمضره
يا صاحبي احترت مدري وش الرأي
وأنا اللي كنت أحسب سواتي مبره
أخاف تقسى وأتعذب بدنياي
وانته بعادك محرق القلب حره
وأخاف تنسى وكل خوفي من الجاي
ويعم خير الحب والصدق.. شره
سكنتي وأصبحت يا كنك إياي
وحبك بخفاق المولع مقره
علمتني معنى الهنا وصرت سلواي
وعيشتني أيام عمري بمسره
لكن خطاي أصبح سبايب لبلواي
والمشكله إنك رفضت إتشره
والحين أنا جيتك من أقصاي ل.. أقصاي
غلطت أدري والندم ذقت مُره