هرج الرخا

ولا كل من جيته يبي يرفع الراس
ولا كل (صاحب هيبة) يعتزابه
لو كان هرجه بالرخاء يقطع الياس
العلم- لا من كشر الوقت نابه
وضاقت بك الدنيا ودورت قرناس
في شدة الموقف وعند اكترابه
ما تروي الهرجه - والارياق يباس
ما يروي إلا من ينوخ ركابه
لا طق صدره - إنس همك والاتعاس
هذاك ما يقفل عن الناس بابه
يشيل قلبٍ بالمخاليق حساس
ما يعرف الاعذار للي لجابه
هرجه قليل - وطيب العلم والساس
وبعض المواقف ما تحس بمصابه
وبعض المواقف تطعنك طعن دواس
وبعض البشر ما يعترف بالنسابه
حتى ولو شافك مع الوقت تنداس
وبعض المراجل ما تهيا طلابه
المرجله قولٍ وفعلٍ ونوماس
ولا شفت محتاجٍ لك الوقت جابه
لا تتركه والوقت يضرس به ضراس
وقلبي من اللي شاف حل العزابه
قلبٍ طعنه أقرب قريبٍ من الناس
قلبٍ يسولف مع حنين الربابه
(لحن الصبر) ويقول لا باس لا باس
ناصر الشعلان
محافظة الرس