الرابح اللي ما يفرط

يا الله ياللي ماحدٍ غيرك يدوم
يا واحدٍ سر العبا تعلمها
تكتب لنا من رحمتك حظ وقسوم
ويسر لنا نفحات فضلك وادمها
انت الذي تنعم على كل محروم
وان ما رحمت الحال ماحدٍ رحمها
ايامنا تعطي تجاريب وعلوم
وبعض البشر يبطي وهو ما فهمها
اقبالها واقفايها كنه حلوم
ودوراتها حلوٍ ومرٍ طعمها
الرابح اللي ما يفرط بها يوم
ما مر من لذاتها يغتنمها
مع طاعة الله صان عرضه عن اللوم
والعز ودروب المراجل لزمها
نصيحتي ما دمت للنصح ملزوم
ياللي جهلت اسمع لها واستلمها
لا ترافق الا فالعرب كل شغموم
شهمٍ علوم الطيب يوفي سهمها
اللي يصير لرفقته عهد وسلوم
لامن بناها بالوفاء ما هدمها
وان شفت من عرضه مع الناس مذموم
النفس عنه عزها واحترمها
ترى له لسانٍ من الخبث مسموم
عقرب ثريٍ يلدغ ذنبها وثمها
قلته وسلم العرف للناس مقيوم
وعن طولها ياجب علي اختتمها