عهد الوفا

أخطر نبأ يأتي لنا يوم الاثنين
بثا مباشر واضحاً عبر الاعلام
بالتاسعة من يوم ستة وعشرين
تالي شهر سته من النصف بالعام
مات الذي تبكي عليه الملايين
واكبر خسارة للعروبة والاسلام
فهد عريب الساس وقمة هل الدين
عدالته سبع المثاني بالاحكام
راعي الصخا ريف الضعوف المساكين
وبل الندا لاهل الندا وابو الايتام
بنى لنا صرحا عليه النياشين
وحماه من كيد الاعادي والاخصام
كلٍ عرف فعله بشتى الميادين
للضد لطام سريعٍ بالاقدام
نعيد ذكرى موقفه عام تسعين
لنا الفخر في ما فعل طول الايام
ساد الجزيرة واهلها عدة سنين
وراحت كما الغفوة على اضغاث الاحلام
ونوادعه منها وهو ما معه شين
الاحزام وخمسة اذرع من الخام
يالله يا قابل صلاة المصلين
يا غافر الزلات في حج وصيام
تسقيه بالكوثر بحوض النبيين
في رفقة ابراهيم والرسل الاكرام
يالله عسى قبره جنان وبساتين
ومقره الجنة على دين الاسلام
الناس من آدم وآدم من الطين
والروح منحة والبشر جلد وعظام
ودي اعزي به وانا من يعزين
الله يعين اللي قريب بالارحام
خير الخلف نسل الملوك السلاطين
عمن سلف حكام من ساس حكام
الحكم ما جاهم ابليا مثامين
كسبٍ على وضح النقأ برمح واحسام
عيال شبلٍ دوم للحق وافين
ما طاوعوا لاهل البدع واهل الاوهام
وعبدالله المعروف بالعسر واللين
بالعدل مقدامٍ وبالامر جزام
الملك لله ثم له بالقوانين
من ورث ابوه وتاجها فرز الاقسام
حرٍ تخافه نادرات الشياهين
وتهبط حرار الجو وان طار غنام
وسلطان له بالمجد فعل وبراهين
وفضايلٍ ما اظن تحصى بالارقام
يرعى حقوق الناس بالعقل والعين
ويظهر ظهور النور بالموقف الهام
له هيبة منها تذل الشياطين
ويلوذ به عن الدهر كل منضام
ولي عهد الشعب عدل الموازين
حسن اللقا له بالوفا تاج ووسام
سربة هل العوجا رجالا ميامين
أمجادهم زادت على حبر الأقلام
من لابة ما يمنعون المواعين
وصديقهم يحصل على حقه التام
جينا نعزيكم وتالي ملبين
وارواحنا وصلت لكم قبل الأجسام
مبايعة باخلاص والكل راضين
عهد الوفا ما به تواقيع وأختام
دام الوطن عاش الملك قولوا آمين
ويدوم عز المملكة كل الأعوام
عايد رغيان الورده الشراري