الكل فاقدها

مرثية في جدتي التي أسأل الله أن يسكنها فسيح جناته ووصية لوالدي د. عبدالرحمن العشماوي حفظه الله -
يالله يا مسقي عبادك بالامطارْ
يا رب يا محيي عظام رميمهْ
ياللي جعلت الموت عبرة وتذكارْ
أمر من اجلال الأمور العظيمهْ
ياللي خلقت الكون بالناس دوَّار
يا ربنا هات العواقب سليمهْ
هذي قصيدة واسمعوها يالأحرار
هيض من الخاطر يجمّل نظيمهْ
البارحه كأني على صالي النار
صبري نفد ما عاد عندي عزيمهْ
وقت السحر جتني معه ذيك الأخبار
حافت حشايا القلب واهرت صميمهْ
قالوا توفت (جدتي) ياهل الكار
واونست في قلبي تواقد حميمه
تاهت براسي كل هذيك الأفكار
وادرجت مكره فالحشايا قديمهْ
يا (جدتي) وينك بعد كل ما صار
وين العطايا واليدين الكريمهْ
وين الصلاة اللي تجي وقت الأسحار
وين القلوب الحانية والرحيمهْ
والغرفة اللي مستهلة بالأذكار
ما عاد تسوى عندنا اليوم قيمهْ
يا (جدتي) والدمع همَّال مدرار
يا (جدتي) يا راعية كل شيمهْ
ياللي تحذرنا من الشر والعار
تدعي لنا بالستر ربي يديمه
ياللي زرعتي الخير في داخل الدار
بالسر وإلا بالخبر وتعميمه
أنا احمد الله عد ما طاير طار
في سيرتك كل الوفا والحشيمهْ
في ذكرك الطيب كما عذب الأنهار
كل شهد بالحق ماهو ظليمه
الله يصبرنا على كل الأقدار
والكل فالدنيا مفارق حميمه
يا رب ترحم جدتي وانت غفار
في يوم ما يخطي المغرم غريمه
أنت الولي وانته على العبد ستار
ليا زبنك العبد ما حدن يضيمه
تدخل حبيبتنا مع القوم الأخيار
في جنة فيها النعم مستديمه
لا بردها يتعب ولا جوها حار
رحمة من الوالي وفيها نعيمه
مد البصر فيها زهور ونوار
وفيها من الخيرات ما لله عليمه
ويارب تكفيها جزا كل جبار
اللي تصلا بالعذاب وجحيمه
من بعد فرقا جدتي ذقت الأمرار
مثل النديم اللي يفارق نديمه
الكل فاقدها من صغار وكبار
وقلوبنا بأحزانها مستديمه
يابوي خلك عالمقادير صبار
هذا مصير الزرع يصبح هشيمهْ
دنياك ماهي مستهلة بالاثمار
والناس رحالة ولا هي مقيمهْ
مير الدعا يبقى على مد الأعمار
والله ولي العبد والله رحيمه
تمت وصلى الله على سيد الابرار
راعي الهدى والسنة المستقيمهْ