العروق اليابسة

اللواهب في ضميري تواقد ضوها
ياولي العرش ياللي على العالم رقيب
قو نفسي بالصبر والعزايم قوها
عين ياللي ساهره دمعها يذرف صبيب
عانك الله ياعيونٍ تكدر جوها
اتركي هل العباير ترى وضعي صعيب
الشقا ويا العنا و المصايب توها
ياطبيب الحب وينك ترى جرحي عطيب
كان عندك فزعةٍ للمولع سوها
عايش بين الملا بالبلد كني غريب
او كما اللي غادي تايه في دوها
على ربي يرسل السيل لديار الحبيب
مزنةٍ تمطر شهر ويتزايد نوها
مايصير البعد ياللي من النابض قريب
العروق اليابسة ياوليفي روها
الغلا والحب ياصاحبي حظ ونصيب
كان مالك بالمحبة خيامك طوها
مبارك بن سعد السبيعي