هذاك عمي

رثاء في الشيخ صالح بن محمد الخربوش:
الموت حق وكلنا ذايقينه
ومهما يطول العمر لابد فاني
مريت بيته والمشاعر حزينة
شيخ توفى عقب عيد رمضاني
هذاك عمي كلكم خابرينه
راع الكرم والطيب راع الحساني
أبو محمد نادرٍ في سنينه
صعبٍ تلاقي له شبيه وثاني
يعطي ويتعب بالعطايا يمينه
غيثٍ الى شح الدهر والزماني
تبكي عليه الرس تبكي المدينة
وبالمقبرة شفنا كثير المعاني
مرحوم ياللي كلنا فاقدينه
يالله عسى ملفاه خضر الجناني
عسى حقوق الغيث يمطر غشينه
وينبت على جال القبر قحوياني
واختامها مني صلاة بسكينة
على النبي اللي سعى بالاماني
محمد الهادي شفيعٍ بدينه
عداد مازار الحرم مود ماني
وعداد ماطار الحمام ورطينه
وعداد نجم بالسماء يوم باني