ساعة سمع سمعي سيدٍ لي تاج راسي مجد ساسي عز ناسي ريف ضيفه والله إني يابو خالد عجز فكري لك يحلي بس أطالع بالقلم وأوراق من حبره نظيفه ولي ثلاث أيام ما حركت رجلي كود أصلي حيلتي عضة إبهامي لين غرقني نزيفه ويا الله اني راجيتك لعقدة لساني تحلي لين أعبر عن كنين القلب لو حتى نصيفه في حبيبٍ حبه لجملة قلوب الشعب تلي أبو خالد قايد الأبطال رقاي المنيفه أشهد انه كاسبٍ للطيب دايم وامتعلي والحمول الكايده تصبح لمن جاله خفيفه سيدٍ كل المراجل في عباته تستظلي والمكارم والصخا والجود في كفه مريفه كم رحم له من يتيم وكم مسح دمع يهلي وكم جبر له من كسير وكم تكفل من ضعيفه سيدي يا فزعة اللي جاك من دنياه ملي حار فكره ضاع عمره والتعب ماله خليفه جيت أبا أشكي وقتي اللي صاب قلبي منه غلي وقام يحرقني بنيرانه ويطعني بسيفه ويش أسوي ضاق جوي لاعضيد ولامهلي في زماني اللي بلاني بالهموم وبالكليفه عزك الله داو ضدات الليالي لي بحلي وشل حمولٍ عذبت صدري وأنا أضلاعي نحيفه عادتك بدرٍ لظلمات امترجيك متجلي ومن يجيلك حصل المطلوب يا طبه وكيفه
