أدق التفاصيل

صحيتني فالثلث الآخر من الليل
أحرمتني نومي وأنا كنت نايم
شاركتني في وزنة المد والكيل
وتقول عني فيك مانيب هايم
ولازمتني حتى ب ادق التفاصيل
وش عاد اسوي واكسب رضاك دايم
لا بارك الله في هل القال والقيل
المارجين مروجين النمايم
الحاسدين الحاقدين المغاليل
أجسام بنيادم عقول البهايم
عانيت.. لا والله توذيت بالحيل
ما هيب هي يا لابسين العمايم
لكن يا حلمي هلا بك هلا هيل
عداد ما هبت علينا النسايم
قلبي غدا لك طاب فالك مداهيل
بالقيظ والا مع دخول النعايم
أشعل لجياتك شموع وقناديل
وافراح ودلالٍ تصب وولايم
صادق قسم بالله ما هوب تمثيل
وإلا على ما يخلف السلم قايم
ولا هوب كذبة شهر نيسان وابريل
اللي يبررها ردي العزايم
أميل معك وعن هو غيرك أميل
عن حبه هذيّه وهذيك صايم
غنيت لعيونك طروق ومواويل
لعلها كانت لذوقك تلايم
اخترتها من منبع كنه النيل
لولا ضلوعي تردعه جاك عايم
وصلت به صفوة عقول ورياجيل
غنيمتي يا مدركين الغنايم
من حط بين عيونه الجدي وسهيل
ما يلحقه لو ما وصل لوم لايم
والمعذرة والعفو ما ودي أطيل
والا سماي أصبح ملبد وغايم