وش ذنب عودٍ يقضي الوقت تسبيح

يا الله يا منش السحاب المراويح
يا منزلٍ منها المطر وأنت قادر
يا شافي غل القلوب المجاريح
يا واقي العثره وللكسر جابر
تحمي وطنا من شرور التماسيح
سماعة أفكار السفيه المهاجر
اللي تميّلهم حبال المراجيح
الراي والتفكير والعقل قاصر
المسلمين مقومين التراويح
والساذجين ينفذون المجازر
في شعبهم، في دارهم يا مفاليح
ما هوب ظلم ومن يسويه فاجر
وش ذنب طفلٍ توّه يقوم ويطيح
يحلم بباكر بس ما شاف باكر
ووش ذنب عودٍ يقضي الوقت تسبيح
في روضة المسجد ليا الفجر ساهر
ووش ذنب عذراً تلطم الخد وتصيح
ممابها لكن لها الله ناصر
يا الظالمين الضالعين المدابيح
من فعلكم يسخر بنا كل كافر
وش مصلحتكم لا تقولون تصليح
وأنتم وصل تفجيركم للمشاعر
الأمر واضح ما يبي زود توضيح
الدين وأفكار التطرف تنافر
والويم حنا صف وإن هبت الريح
من شذ عن صف الجماعة محاصر
تبقين يا داري صراحه وتلميح
للدين والأمن الحقيقي مفاخر
في ظل أبوفيصل بعيد المطاميح
وعيال أخو نوره سباع المحاضر