ما ندري وش اللي صار

وش اللي صار ما ندري؟ ولا ندري وش اللي صار؟
ولا ندري وش اللي بالليال المقبلات يصير؟
تعلّمنا من أسرار الحياة.. إن الحياة أسرار
وتفسير الحقيقة.. بالحقيقة ما لها تفسير
ومن غدر الزمن كلٍ يقول: إن الزمن غدار
فكم ممسي على قمة جبل و أصبح بقاعة بير
ومن مكر البشر كلٍ يقول: ابن البشر مكار
فكم بالناس حامل مسك؟ وكم بالناس نافخ كير؟
صحيح أن الصحيح أصبح خطا والعار ردّ العار
ولكن ما لنا حيله ولا نقوى على التغيير
نشوف اللي نشوفه من مصايب واليدين قصار
تحت ر حمة رحيم وفي رجا الله والي التدبير
نسوق العِير بأمر الله ونمشي لآخر المشوار
وعلم الغيب عند الله.. وبأمر الله تسير العِير
نعايش وقتنا ونسايره ونقول: يا ستّار
علينا تستر بسترك.. وبأمرك يالله التيسير
نفكّر بالليالي.. والليالي تفخت الأفكار
ولا زلنا نفكّر كيف ممكن نترك التفكير
وش اللي صار ما ندري؟ ولا ندري وش اللي صار؟
ولكن كل شيء ممكن انه بالحياة يصير