دمعة الوجد

خل الأماني تسكن الياس وتموت
وش عاد لو مات الأمل في غيابك!!
العمر ضايع فيك أوفايت الفوت
نفس الحكاية بي تجدد صوابك
حبل اللقا ما بيننا صار مفلوت
قريت أنا سطر الألم في كتابك
صرخة/ ندم/ أو هم/ أو طيف ممقوت
كل المشاعر غارقة في عذابك
اسمك على لوح العمر صار منحوت
حبر العذاب اللي لجا باغترابك
صابر واشوف العمر من عمري يفوت
واسأل واقول الوقت وينه غدابك
تفضحني الدمعة كما عالي الصوت
لاهمت في كونٍ به الوجد جابك
بعدك عذاب ويحرق القلب بسكوت
ارجي عسى يمطر عليه سحابك
في غيبتك صار العمر كنه الموت
يا ليت تدري وش عمل بي غيابك
عبدالله بن سمير الحربي