عسى له الجنة مقر

قصيدة في رثاء الفقيد نقاء بن عماش بن فهيد
يالله يالمعبود يامجري الاسباب
يا عالم بالبينه والخفايا
خلقتنا يارب من طين وتراب
وعلمتنا درب الهدى والهدايا
الطف بنا يا معتلي خير وهاب
واغفر لنا من كل ذنب وخطايا
في ساعة والقبر ما عنه مجناب
كل يجازا بالعمل والنوايا
يارب من دمعه على الخد سكَّاب
بان الصباح وباقيله بقايا
حامي دموع حرقت سود الاهداب
وشي لجا خلف الضلوع الحنايا
من عقب ابو فيصل والافكار غياب
اسج مدري وين يمة نحايا
مرحوم ياللي عشرته دون الاقراب
ما مرةٍ حط الرديه وصايا
دون الرفيق اليا وقف ستر وحجاب
مواقفه ضلع طويل الحجايا
له بالوفاء مبدأ على راس مرقاب
ويمناً تجود من الكرم دون غايا
يالله ياللي من ترجاك ما خاب
تجعل له الجنة مقر ونهايا
وأزكى الصلاة اعداد ما خط بكتاب
على نبي الله شفيع البرايا
الشاعر عبدالله بن مفلح بن جفين الشيباني