حنا الولاء.. مشاعرٍ ما هي شعار

قم يا قصيدي واعلن الحب.. واختار
اللي لنا من بعد ربي مظلة
«آل السعود».. أقولها.. سر وجهار
«لآل السعود» الحب دِقّة وجِلّه
ما غيّروا فينا «خبيثين» الأفكار
ولا زعزعوا فينا الأحاسيس لله
ميزاننا ما يحكمه.. عشق «دولار»؟
ميزاننا في حبهم حب مِلّه
على الشريعة.. رضوا كل جبار
حامينها عن كل خِلّه.. وعِلّه
«سبعين عامٍ كلها اعمار في اعمار
هم لبسوها بالغلا.. كل حِلّه
تجاوزوا «بالمملكة» عمر الأقطار
حرّه بحكم احرار هي مستقلة
وحنّا الوفا.. من طبعنا صغار وكبار
شفناه فيمن ورّثوناه كله
وحنّا الولا.. مشاعرٍ.. ما هي شعار
سيفٍ على العدوان معهم نسله
وحنّا المطر.. نحمي سما الدار لا ثار
عج النوايا السود عمدٍ.. وزلّه
وحنّا العمى.. لعيون الاشرار لا طار
منها شرار الحقد.. حنا دوا له
وحنّا المنايا.. للمفسدين باصرار
وحنّا عذاب اهل العلوم المضلّه
وحنّا الشهد.. للمخلص البار بالدّار
وحنّا الأمان لكل من جاه ذِله
وحنّا لبوفيصل على كل بوار
وحنّا لبو متعب رموشٍ مظله
وحنّا لبو خالد.. ربيع ونوّار
ديمة غلانا.. كل منهم تبلْه
قم يا قصيدي.. بلّغ ابواق الأخبار
قريب والا.. مبعد هناك! قل له
لو ما بقي من «أسرة المجد» ديّار
إلا رضيع.. مبايعينه غلاً له