الموت يفرق بين غالي وغالي

لا عاد يوم السبت من بِدِّ الأيام
آخر رجب قبل يهلَّ الهلالي
يومٍ عليّ كنه ثلاثة عشر عام
بكيت في تاليه وانغثّ بالي
أنام ساعة واربعٍ منه ما أنام
عساه ما يجري لك اللي جرى لي
كسرٍ ولا يجبر على طول الايام
وجرحٍ ولا يمحاه طول الليالي
راح الرفيق اللي لنا ذخر وحزام
يشكي عليّ وأشكي عليه الحوالي
من عقب صالح صرت من حسب الأيتام
لو كنت وسط الناس كني إلحالي
لا و الله اللي تو ما صابن إهيام
ضاقت بي الدنيا وِبَيَّن خمالي
ما أنساه ما دامت بالاجسام الأنسام
لا والذي يِنْشي ثقيل الخيالي
أثره صحيحٍ كل ما طاب دام
الموت يفرق بين غالي وِغالي
يالله ياللي للخفيات علام
ياواحدٍ فوق السموات عالي
نقَّ الفقيد من الخطايا والآثام
وإجعل مقرّه في نعيم الظلالي
وإجبر عزاء اللي كمَّل إسبوع ما نام
إلى بغيت أنام شفته إقبالي
وعلى النبي إعداد ما خطت أقلام
أزكاء صلاةٍ كل ما جاء مجالي