مع درب الأخيار

كلمات رثاء في المغفور له بإذن الله الفريق أول علي المشعوف قائد المنطقة الغربية «سابقاً»، الذي انتقل إلى رحمة الله تعالى مؤخراً كتبها ابنه متعب بن علي المشعوف:
يا الله يا المطلوب يالنافع الضار
أنت الذي ما غيرك أحدٍ رجيته
يا عالم تعلم بمكنون الأسرار
يا من عن أهل الفيل بيتك حميته
يا حاكمٍ بيديك تصريف الأقدار
ربٍ إلى ضاقت عليّه دعيته
أطلبك ترحم والدٍ خيرٍ بار
وتعوضني بالخير يومك خذيته
مرحوم يا مدفون في دار الأنصار
بين الصحابة عمر الله بيته
مرحوم ياللي لك مع الناس تذكار
ذكرٍ تعلا بين الأجواد صيته
مرحوم يا مصخي من العسر الأيسار
تعطي عشى عيالك ولو ما لقيته
مرحوم يا مصخي على النفس الإيثار
كم طالبٍ من جود ربي عطيته
يا شاري المعروف في غال الأسعار
يا بايعٍ دنياك فيما اشتريته
ما أنته من اللي يتقي خلف الأعذار
تشوف فعله بالوفا لانخيته
رحلت عن دنياك مع درب الأخيار
دربٍ كتبه الله عليك ومشيته
يا بوي يبكونك كبيرين وصغار
ويبكيك محتاجٍ بطيبك كسيته
ويبكيك قومٍ بالطويلة لهم كار
مطير بيضان الوجيه البخيته
ويبكيك منهو داخل السجن محتار
فكيت قيده بالوفا واحتميته
ويبكونك اطفالٍ صغار وقصّار
ويبكيك بيتٍ للنشاما بنيته
وتبكيك دله ما لها بن وبهار
ويبكيك فنجالٍ لضيفك مليته
يا ليت تقدير المقادير ما صار
أو ليت نفسي قبل لا تعاد ميته
أو ليت يمهل له وتفداه الأعمار
لو الفدا يقبل بروحي فديته
لا شك ما للعبد حيلة ويختار
واللي كتبه الله عليّه رضيته
صابر ولو ما طاعني دمعي الحار
غصبٍ عليه ظاهرٍ لو كنيته
إلى ذكرته هلت العين بعبار
يا أعز وأغلى واحد قد بكيته
اذكر مزوحه معي في وقت الاسحار
لا قال متعب وين.. قمت ونصيته
وشلون أنا بنسى وأنا أشوف الاثار
لو ألتفت في كل وجه رأيته
ما أنساك ما دامه على الأرض ديار
أموت وأحيا والدي ما نسيته
يا حافرين القبر زيدوا له أمتار
خلوه واسع مثل صدره وبيته
خلوه ظاهر ويتبين لمن زار
من شان أفيّض عبرتي كان جيته
آيست منه ولا بقى غير الأذكار
وحبل الرجا من دون شوفه طويته
عساك في الجنة وتحجب عن النار
وعسى كتابك في يمينك قريته
تنعم بحور العين في دار الأبرار
وتشرب من الكوثر على ما اشتهيته
وتقطف من الأثمار في ظل الأشجار
عيشٍ تهنى فيه وأنت أهتنيته
آمين يا ربٍ للأوزار غفار
يا من جميله وافر ما حصيته