ماهوب حق

عسى ربي يصبرني على فرقا عديل الروح
وليف تل قلبي من غلاه وصد واشقاني
تمكن حبه بقلبي وقلبي دوم له مفتوح
ولا ظنيت خلي لو يطول الوقت يجفاني
غزير الدمع هليته تكدّر خاطر المجروح
على اللي غاب له مده ولا شفته ولا جاني
عليه الله اكبر صار دمعي للعرب مفضوح
منامي يا هلي في غيبته ما عاد يهناني
عليه أبكي عليه أسهر عليه أندب عليه أنوح
اشوفه دايم اقبالي خياله ما تعداني
ابرجي رجعته لو راحت أيامي بلا مصلوح
على شانه عزيز وعايف ربعه على شاني
يجيبه لي عزيز الملك كان أنه كتب باللوح
ترى ماهوب حقٍ عقب ذاك الود ينساني