وداعك.. وفرقاك

أشفق على شوفك وهرجك ولاماك
واذكر ويمنعني لاجيك الوداعي
ما يحتمل قلبي وداعك وفرقاك
والحزن والعبرة وكسر الشعاعي
ولا يحتمل كثرة تنهدك وبكاك
اخاف يقدرني واجيك متداعي
ثم اتسبب في مشاكلك وابلاك
ويضيع مستقبل حياتك ضياعي
ويضيق بي ثوبي وتشمت بك اعداك
واندم على تصرفي واندفاعي
هذي سبايب صدتي يوم تخفاك
هذي سبايب غيبتي وانقطاعي
والا الغلا غالي ومغليك مولاك
غلاك فوق القدر والمستطاعي
سخرت لك طرفي وحرفي والابواك
وارخصت شي بالذهب ما يباعي
قلبي واحاسيسي وما جاك يفداك
تستاهله وانت الحشيم المطاعي
يستاهله عنقك وسمحة محياك
وتستاهله خرس العيون الوساعي
وتستاهله من شعر راسك لماطاك
ماشوف للتفصيل والوصف داعي
حيث انني لو اجتهد في مزاياك
لا يمكن احصيها بشتى المساعي
لا يمكن احصيها ولا يمكن انساك
هذي حقيقة موقفي وانطباعي
لا عاد تنشدني ولا عاد يخفاك
اسباب عنكم صدتي وانقطاعي