يا ناس أنا بنت أكتب وقصاده

قصيدة من الشاعرة سحايب خير من دولة الكويت بعثت بها إلى شواطىء ويسرنا اليوم أن ننشرها:
والله ماني عن اللي صار نشاده
كتبت شعري وقافيته على حروفه
ناديت فكري.. وقلت الشعر رح ناده
ولبى ندايه وصعّدني على كتوفه
ونادى المشاعر وجات تقول منقاده
عسفتها لين صارت غصب معسوفه
عل وعسى مع صراع الفكر وجهاده
كلٍّ يعرف العروس ان جات مزفوفه
الشاعره ما هي برجال يا ساده
يوم ان كلّ عليها يشهر سيوفه
الرجل ما يلبس اسوارات وقلاده
ولا ظنتي ينقش الحنى على كفوفه
ومن دش باسم المره ياكثر نقاده
ياخذ على الثوب والتسريحه بروفه
يلبس نقاب ويبدل اسمه بغاده
ويرمي عقاله ويلبس عنه نفنوفه
الرجل.. رجال ما ينزل عن شداده
والمشتبه ما هو برجال بوصوفه
وأنا على الصدق.. يا أهل الزيف معتاده
ما أحد كتب لي.. ولا بالكذب مكلوفه
شعري فرضته وجنن كل حساده
ونجم برز ما تهزه ناس ملقوفه
وترى الاشاعه لكل اللي وصل.. عاده
واللي بشك ب«سحايب» حره بجوفه
يا ناس انا بنت.. بنت.. اكتب وقصاده
ومن لا أقتنع بي يطق براسه الطوافه