حلول اللغز

نشرنا في عدد الأسبوع الماضي لغزاً كتبه الشاعر المعروف ناصر بن عبدالله المسيميري من محافظة الرس وكان نصه:
انا ابا انشدك عن بنت الى حلت له بمنزال
اظنه ما تحول عنه طول العمر يا كافي
ولو كل يشيّب ما تشيب ولا تجيب عيال
تشاف بمنزله في حال والا حال ما تشافي
وكالعادة تجاوب قراء الجزيرة مع اللغز وجاءتنا عشرات الحلول.. وبعد الفرز استحق النشر الحلول التالية التي اكتملت فيها جميع الشروط:
هلا بك يالمسيميري وش اخبارك وكيف الحال
عساك بخير يا راع الوفا دائم ومتعافي
تراني ما ملكني غير ترفٍ فيه حبة خال
اسر قلبي وسلمت الجوارح له والاطرافي
موسم بن سفر القثامي - الطائف
هلا بك يالمسيميري تحية قلت كيف الحال
انا اقول ان لغزك يالسنافي ضافي ووافي
انا برمعه رمعة قلت يمكن ذيك حبة خال
تراها وصف واضح كان توجد بد الاوصافي
سعد بن صنهات السهلي - الدرعية
هلا بالشاعر الراوي ابو الالغاز والامثال
هلا باللي كتب لغز الجريدة واضح وافي
قريت اللغز يا ناصر وحله صار حبة خال
خلقها الرب في ابن آدم تشاف ومر ما تشافي
عبدالاله حسن القعيري - المزاحمية
قريت اللغز يا ناصر وبنتك حلها الحلال
تراهها خلقة الباري ولغزك يا ولد وافي
الا يا زينها في خد منهو يلبس الخلخال
هنوف تنقش الحنا ورمش عيونها ظافي
عبدالله سعود الدغيثر - ضرما
الا يا مرحبا بك يالمسيميري وكيف الحال
وترى لغزك عرفته يا عميل الخير يالوافي
تراها شامة يا صاحبي وان قلت حبة خال
على ناس تلاحظها وبعض الناس ما تشافي
محمد بن عبدالعزيز الخنيفر - اشيقر
سلام الله عليكم يالمسيميري وسيع البال
قرينا ما كتبته بالتراث المعدن الصافي
اشيل اللغز واحطه لقيته حبة للخال
تجي بالجسم معروفة مكان بين أو خافي
علي رشيد الرشيد - رياض الخبراء
الا يا صاحبي ناصر بعد جبت العلوم جزال
وهذي عادة لك في الوفاء بالصاحب الوافي
هذا والحل يا ناصر يسمونه بحبة خال
تجي في الوجه ولا يالمسيميري فالاطرافي
عبدالهادي فهاد العرجاني - الافلاج
هلا في صفحة فيها القيد وسيرة الابطال
وهلا يا شاعر الالغاز يا من تبدع القافي
تقول انشدك عن بنت واقول البنت حبة خال
عرفناها من اوصافك لها يا الشاعر الوافي
عطا الله بن سليمان العطا الله - الزلفي
هلا في شاعر المعنى.. هلا في شاعر الامثال
هلا بالطيب الغالي. هلا بالطيب الوافي
هلا باللي مجمّل لغزه المنشور حبّة خال
هلا يا مرحبا ترحيبة من قلبي الصافي
عبدالله بن غازي الحنيني - الضلفعة
هلا باستاذي الفاضل هلا بك يا وسيع البال
هلا يا من له بقلبي معزة مالها اوصافي
لقيت البنت يا الغالي لقيته حبة للخال
بجسمي شفتها سودا وضعها عالم الخافي
صالح بن عبدالله الزرير التميمي - الرس
هلا بناصر هلا بلغزه هلا بللي صدق لا قال
هلا بصفحة تراث اللي بها التجديد ينشافي
شامه اصلها وقالوا عربنا حبة للخال
زهت في خد من خده مثل لون القمر صافي
فهد بن عقيل الطويان - بريدة
سرى فكري على كف الفضا ينشد عن المدخال
ولقيته عقب ما اشقاني بحل كامل وافي
لقيت الحل يا قربه وهو بالجسم حبة خال
وحل اللغز واضح ما يبي ارباع وانصافي
محمد بن حمد البدر - الزلفي
الا يامرحبا تعداد ما حل المطر همال
من امزون ايداعبها الرعد والبرق رفافي
قرينا اللغز والمعنى على الحل الصحيح يقال
ولغزك حله الكيه على ما قيل يا كافي
خليف الحربي - الرياض
الا يا طالبٍ لغزٍ جميل ما عليه جدال
زعيمه ناصر المشهور يكتب ما تبي وافي
ويا ناصر كشفت اللغز والمقصود حبة خال
ولك يا ابو محمد وجهت حلٍ كاملٍ كافي
سلطان التميمي - الرس
هلا باللي كتب لغز التراث اليوم طاب الفال
هلا في شاعر الالغاز ناصر نسل الاشراف
لغز تبي يا صاحبي ترى جوابه حبة خال
له منزلٍ على جلد الانسان بيّن وخافي
راشد بن ناصر الشقيق - الاسياح
هلا باللغز وراع اللغز ناصر وافي الافعال
نعم وا في ولغزك يابو عبدالله بعد وافي
وحله كان ماني مخطيٍ يا خوك حبة خال
تشاف بمنزله والا تجي في منزل خافي
منصور بن عبدالله المجيدل - الرس
صور من الصحراء
الدخالة في الشعر الشعبي
مشعل الجبوري
الدخالة او اللجوء عادة لدى البادية في الماضي والدخالة ليست اختيارية من الشخص المدخول عليه بل كما قيل «الدخالة بلوى» وهي ان يلجأ شخص الى آخر اقوى بسبب خوفه من شيء معين او ان يكون مسافرا ويصرح انه بوجه فلان من الناس من اجل حمايته او يقوم بوسم عصاه بوسم مضيفه حتى وصوله لمأمن والشعر الشعبي سجل هذا الامر في قصائد وقصص كثيرة منها ان الشاعر صقار القبيسي من الفضول جاءه قوم مطاردون من قبل شيخ عشيرة اخرى ورغم قلة عدد قومه فانه رفض تسليم هؤلاء المستجيرين به وقال عدة قصائد منها قوله:
يا علي ما نمشي لك الحق بالضيف
الضيف ضيف الله ولا احد مشابه
الضيف له حق ونحماه بالسيف
عند المحارم ما نهاب الحرابه
وقال ايضا في هذه المناسبة:
امر سديته يا علي ما بعد صار
جيتوا تبون ضيوفنا غصب عنا
رجالنا يفرح الى شاف خطار
يقحص لهم عجل ما هوب يتونا
لاجن يسوجن السفايف والاكوار
لا لوذن ببيوتنا يرجهنا
اول قراهم من حليات الاثمار
غرايس طلعة سهيل اثمرنا
وثاني قراهم دلة نصفها بهار
ونجر نلاعب به على كل فنا
وثالث قراهم حايل دوم تندار
ومناسف لضيوفنا ينهضنا
وش عذرنا من لابس الخصر وسوار
اللي يرشن الذوايب بحنا
والشاعر رميح الخمشي قال قصيدة مشهورة في حق رجل لجأ اليهم يدعى مصعب الصلعا منها قوله:
قصيرنا ما حشمته عندنا يوم
يزيد مع زايد سنينه وقاره
الا قزت عينه قزينا عن النوم
والشيخ ما يكتب عليه الخساره
دونه نروي كل حد ومسموم
ترخص عمار دون كسر اعتباره
مصعب ظهر مضمون الا من القوم
حنا نخلط جمارنا مع جماره
ومحمد بن دوخي السمير استجار به شخص ورفض تسليمه الى السلطة العثمانية في ذلك الوقت.
وحدثت بسبب ذلك معركة وقال ابن سمير عدة قصائد يوضح حمايته لمن لجأ اليه منها:
يا شلاش ما نعطي دخيل نصانا
لو جمعوا كل العساكر والاروام
وقال ايضا:
يا شلاش ما نعطيك حمر الطرابيش
لو جمعوا كل العساكر علينا
دونك نسوق المال والخيل والجيش
وان لزموا يا شلاش نرهن حدينا
وقال:
عذروبنا حكي الجوق ما ندانيه
نقب قبت ولعة من شبوبي
قله بضف محمد كان يبغيه
واللي يقرب للدخيل مهزوبي
وشواهد الشعر في هذا الجانب كثيرة وجوانب اخرى مشرقة من البادية والصحراء تقرأونها في صور اخرى.
لغز الأسبوع
لغز الأسبوع كتبه الشاعر فهاد بن عايض بن عمير من الرياض ويقول فيه:
انشدك عن رجلٍ مسمى ومعروف
وقت الشدايد ينفعك.. بس ينعاف
ينفعك بظروف ويحرجك بظروف
يركب عليك ولا تشيله بالاطراف
فهاد بن عايض بن عمير - الرياض
لسانك وقلبك
يا بن آدم لسانك وقلبك ملمك
ترى اصغرينك للاوادم مراتي
لا جيت مجلس خل الانصات همك
اخذ المفيد وخل غيره فواتي
ان ما نشدوك وخلو البال يمك
ما للسوالف لو تسولف طراتي
ولا كل من يدلي بدلوه لجمك
قصده ظما ما تعرف الخافياتي
وان شفت ناس بالمجالس تهمك
اخير من بعض الكلام السكاتي
ويا زين مدري لو خالك وعمك
لا قلت مدري ما يجيك الشماتي
ترتاح وتريح ضميرك ودمك
عن كثر قيل وقال هذي وصاتي
سرور سفاح المطيري المذنب
شاعر الأسبوع .. سعد بن جدلان
هو الشاعر المبدع/ سعد بن جدلان الاكلبي احد شعراء وطننا البارزين والمبدعين، شاعر اشتهر بجزالة قصائده يتصف شعره بالتصوير الدقيق وجمال المعنى وكذلك سهل الحفظ، طرق جميع أبواب الشعر. وكذلك شاعرنا يجيد شعر المحاورة وله عدة محاورات مع رموز هذا الفن. اليكم مقتطفات من شعر هذا الشاعر..
قال شاعرنا عن خادم الحرمين الشريفين هذه الأبيات من قصيدة طويلة:
عاش الزعيم اللي رفع راية الدين
هو عزنا.. هو نورنا هو زحلنا
بطل الخليج وخادم للحرمين
قايد مسيرتنا.. محقق املنا
دنيا ودين وسلطةٍ للسلاطين
وفيه الخصال الطيبة يوجدنا
ومن قصيدة اخرى يقول عن قائدنا المحبوب:
زعيم مواضيع الحقيقة يبرهنها
زعيم سلاطين الدول تحسب احسابه
فهد في جميع ظروفنا واحدٍ منا
لكن لا تقدم عند الاعداء فهد غابه
وعن صاحب السمو الملكي الأمير/ عبدالله بن عبدالعزيز ولي العهد قال شاعرنا:
ولي عهده يأمن العهد عبدالله
تفكيره.. هو التفكير والجابه الجابه
ابو متعب اللي لا وقف موقفٍ يافي
على كل رأي طال شبره وطلنابه
أما عن مؤسس هذا الكيان العظيم جلالة الملك/ عبدالعزيز بن عبدالرحمن آل سعود قال شاعرنا:
أنتم يال مقرن منبع العز والهيبه
بيت العز منكم ياعمد البيت واطنابه
ورثتوه من راس اصوك الراس اخو نوره
اللي سمرت عجلان شلفاه في بابه
حكمها وحيد لين حقق مطاليبه
بوقتٍ مضى ما فيه مدفع ودبابه
ايامٍ يصارعها على القب والضمر
وكم دار صبح به.. وكم دار مسابه
وشلفٍ يوردها على القلب والنحر
ورمح يثبت فالتلابيب مضرابه
وليا قيل منهو قلت عبدالعزيز اللي
لا قبله ولا بعده عقيدٍ يحلا به
الرفقة الطيبة سلعة غاليه في ثمنها عند الرجال الأوفياء، عن فقدانها قال شاعرنا هذه الابيات من قصيدة طويلة
ونّ ابن جدلان من لايعٍ لاعه
كن في كبدي دوافير صناعي
العب المنكوس واحب روجاعه
مملٍ فالوقت والوقت خداعي
ما دريت ان ضحكت الوقت خداعه
شفت مدخالي ولا شفت مطلاعي
لا بغيت اسج والا انبسط ساعه
دق قلبي من وراء حدب الاضلاعي
كن من بين الضلوع الة طباعه
تشتغل لا نمت واقوم مرتاعي
هم قلبي ما يفرق تجماعه
غير جر الصوت والناس هجاعي
فاقدٍ لي سلعة وأكبر بضاعه
سلعةٍ تشرى ولا هي بتنباعي
رفقة الطيب اليا غير اطباعه
اشهد انه كية توجع اوجاعي
الظروف تبين مدى صحة الصداقة من عدمها شاعرنا يبين لنا بهذه الابيات حاجتين مرتبطة بالصداقة حيث يقول:
ظروف الشدايد سدها للمراجل فيد
ويقدرها راع الوجهات والنصب والبرقه
الا حاجتين تبحث اللي مداه بعيد
ليا طال المرض.. والا ليا طالت الطرقه
هاذي والله اللي يظهرن الردى والجيد
ومن فاز بالثنتين ذولي ظهر فرقه
في أحد المواقف قال شاعرنا هذه الابيات من قصيدة طويلة:
الا يالهبوب البارده عجلي هبي
على جاش من قامت هواجيسه أتلوبه
أنا مرةٍ اصحي ومره يغيبي
وأسرح معا كثر الطواري بغيبوبه
الا يادهر ما هو بحقٍ تلاعبي
وخليتني لمقرد الخلق لعبوبه
أعبادٍ مغفله الزمان وتعجبي
يحسبون قل المال فالرجل عذروبه
وأنا قانعٍ باللي علىِ كاتبٍ ربي
ومومن بمقدروه وقائع بمكتوبه
ولا ابغى عمى الاريا برايه يجربي
وهو ما عرف ماجوب ربي وماجوبه
هذور المجالس راعي المدح والسبي
وهو بالخلا لوجاه بنتٍ خذت ثوبه
يقولون لي جز من تصرفك وتحبي
وهي توبتي من مجتمعهم هي التوبة
ديار الوباء من طبها راح متوبي
وقرابة الجرباء على الحول مجروبه
الشعر(ديوان العرب) وأصدقه يخلد الافعال ويبقى تتداوله الاجيل عن ذلك قال شاعرنا:
الشعر صدقه على الافعال تأكيدي
وتقبل شهوده بدون أصكوك وأثباتي
مجده يخلد ابيوتٍ للاجاويدي
تبقى ضويه بعد الأسلاف حياتي
وأكد بطبع العروبه والتقاليدي
من لا نفع حي مايفقد ليا ماتي
ما هو بشعر المظاهر والمقاصيدي
يا صاحبي رش خبزك من لبن شاتي
في الابيات الاتية يتحدث شاعرنا عمن يبذل المعروف في غير اهله ومن لايعير لذلك أي تقدير:
من نفعة اللي ما طلبني منافيع
جميلةٍ في غير اهلها ضياعي
باسواقها ماعاد لاشري والا ابيع
لخطيت من رفقة طويل الذراعي
اللي على الرفقه تسوقه دوافيع
هذاك تشرى رفقته ما تباعي
اما يشجعني على الطيب تشجيع
والا يعلمني حميد المساعي
في احد المواقف قال شاعرنا هذه الابيات من قصيدة طويلة:
يا وجودي يا الله أنك تزينها تزين
كلما ظنيت لي ظن خابن الظنون
والله اني ما عتذر عن لوزم الطيبين
وان عسرني فالمطاليق دايم يعذرون
لانهم قد حدهم وقتهم ومجربين
مرة يلقون وامرار ما يلقون لون
فالخلا عندي زبادٍ ونسمة ياسمين
خير من ترحيب ناسٍ مغير يجاملون
اتلذذ بالخلا من عداة الغايبين
واجتماع اللي يقولون ما لايفعلون
مرخصين انفوسهم وابخلا مستكبرين
دايمٍ من دون في دون حتى ينفقون
أما قصائد شاعرنا الغزلية فهي كثيرة جداً له قصائد غزلية تحمل صور شعرية رائعة اليكم مقتطفات منها:
يا ثقلي.. ويامقوا عزومي وياصبري
أجامل على جرحي وأنا اشوف دكتوره
تزود عذابي وكل شيء على خبري
لا شين تغير لا طبيعة ولا صوره
جبرني غرامك يالطيف الحشاء جبري
على الموقف اللي فيه الانظار محصوره
لا رحت منكم كني احدا على قبري
ولا جيتكم ودي بالاحوال مستوره
ومن قصيدة غزليه رائعة اليكم هاذين البيتين:
يا صاحبي جاني على هرجتك ضموه
والهرجه اللي غير هرجتك ما اطعمها
هروجك عطتني عن هروج العرب حموه
تسولف على الناس غيرك ولا افهمها
ومن قصيدة غزلية قال شاعرنا:
يامل قلبٍ هبوب الحب لا هبته
كثر الهواجيس تقبل به وتقفي به
عليك يا عود أبان ناعمٍ نبته
يا مسك يازعفران الهند ابوشيبه
اشفي لك اسفا من المذهب لذاهبته
وأشفق له اشفق من الوالد على صيبه
وهذه ابيات غزلية تحمل صورة رائعة قال شاعرنا:
ياليت.. يامل قلب منك يازين
ماعاد تستخدم الا في غرضها
ناسٍ يقولونها ما هم بدارين
من غير تفسير معناها حفظها
هنيهم في هواهم مستريحين
لا فاتهم حاجةٍ جاهم عوضها
ما تدري ان المحبة للمحبين
ما تنفرض كان ربي ما فرضها
سلاسل الولف لا شبكة بين قلبين
تبطي واهلها مطاولها مرضها
فالزين ما هو بزين الخد والعين
الزين جمع الطبايع مع بعضها
ومن قصيدة غزليه يقول شاعرنا:
انا العي كما يلعي من الورق مفجوعه
على بيضها اللي شافته وخذ من عشه
على صاحب معه العلاقات مقطوعه
عراوي فوادي عقب فرقاه منحشه
احبه محبه داخل الصدر مزروعه
تغذا على دم الشرايين والمشه
هروج العواذل فيه ما هي بمسموعه
وراع الهواء من ينصحه كنه يغشه
ومن قصيدة غزليه اخرى يقول شاعرنا:
أنا وين ابا القاء يالاجويد فاعل خير
حريصٍ على سر المحبين لرسلته
امنول لو اصبر عام مابان بي تأثير
وهالحين حتى صبر يومين ما احتلته
أنا مثل صقارٍ تولع بحب الطير
ولف قلبه افروخ الصواريم وهبلته
تولعت في فرخٍ قصيبٍ يتل السير
ابي لمحةٍ من نظرة الحر واسبلته
صغير بسنه غير عندي ما هو بصغير
يا مغلاه في قلبي وياكبر منزلته
اجمع له اسمان الهرج خوفٍ من التقصير
ولا جيت ابا اشرح له كلامي تهيزلته
شاعرنا اهدى هذه الابيات نصيحة لفئة من الشعراء حيث قال:
يا هل القصيد مراسلين الجرايد
تكفون صونوا كلمة الشعر تكفون
خلوه يلقى من وراكم فوايد
فيدوا وخلوا غيركم يستفيدون
لا تعرضون انفوسكم للنقايد
الرابح اللي من غثا الناس مصيون
اليا بغيتوا نادرات القصايد
صيتوا لشعار الادب وش يقولون
اهل الادب والتجربه والركايد
امثال مرشد.. والعطاوي وابن عون
صدر لشاعرنا ديوانه الأول (سمان الهرج) وهو اسم على مسمى حيث يحمل قصائد رائعة.
نتمنى لشاعرنا التوفيق. وكل عام وانتم بخير..
وإلى اللقاء مع شاعر آخر.
زهران عون الله المطيري - بريدة
محاورة
هذه المحاورة جرت بين الشاعرين الكبيرين/ الشاعر/ مطلق بن حميد الثبيتي رحمه الله والشاعر الكبير/ شليويح بن شلاح المطيري.
مطلق
ياسلامي على اللي ماجحدنا مكانه
يعرفونه هذيل ويعرفونه سباعي
لو لزمنا شليويح وقطعنا لسانه
يصفي البحر وانزل حمول السواعي
شليويح
مرحباً بالعميل اللي مساير زمانه
نوب يبني قصور.. ونوب يبني شراعي
كل ما يذن المذن تسمع لاذانه
لو تراعي هل التوحيد ما أنته مراعي
مطلق
كل مامرني فارس عزومٍ حصانه
قلت من رفسته يالله تسلّم كراعي
ما نلوم الغشيم اللي معذبك شانه
لو لقينا عظامه في بطون السباعي
شليويح
لا تمر الحصان اللي يزيد اربعانه
من بغى يصقل الرجلين طق الذراعي
أنت مثل الكريم اللي يضيع دهانه
لو بغى يحفظ الزبدة ترى الدهن ماعي
مطلق
اعقل شعيل لا يمشي طريق المهانه
وأشبعه من غصون الطلح لن كان جاعي
نص فنجال لو نعصرك يالبرتقانه
مابقى للحجيج الا طواف الوداعي
شليويح
البعير الصعب ماقط مسوا بطانه
تحسب انك ليا قدته وراء الزمل اطاعي
لاتعصرون روس الشوك والعلم امانه
لا تدخل يدينك في حلوق الافاعي
مطلق
ماضربنا اليتيم ولا نعرف الخيانه
لا تضيّق على الناس الدروب الوساعي
أنت ورعٍ تبا الراحه ودار الحضانه
يوم قطعت ديس امك وعفت الرضاعي
شليويح
كان سويتها بالقوم كيد ولعانه
كيل صاعك واخذ بالصاع عشرين صاعي
الولد كان غايب يحتمونه خوانه
وأنت وش جبت لامك يوم سرحان جاعي
مطلق
انته أغرب من العنقا.. وبيض السمانه
يضحك الخسي« منك ومنك يبك الرفاعي»
انت لين ظهر الين من الخيزرانه
والعرب يرقدون الليل وابليس واعي
شليويح
انت سبعٍ تجس الدار عندك حصانه
مير جالك عميلك يالعميل القطاعي
الحجازي موسم كل زمله وضانه
وراح في ديرة اهل الشرق.. بالشرق ضاعي
زهران عون الله المطيري - بريدة
الهوامش
* الشاعر الكبير، محمد خلف الخس