جهام الظنون

يا مدعّي الجود هي هيّنه تظلم
الناس قالت ترا الأظلم هو البادي
من جرّب المرّ يلعن سيرة العلقم
يطري لي الموت وأنسى يوم ميلادي
سهيل ما له ومال الجدي والمرزم
كلاً على يمّته.. وسهيل ما سادي
جرحي وأعانيه وإلا الناس ما تعلم
عساه ما يفرح من الأدنين حسادي
كنت أنشد الحلم جوده.. صح كنت أحلم
ضاقت فجوج الديار وكبّر الوادي
الله يرحم وبعض الخلق ما ترحم
ثورة جهام الظنون ولعنة عنادي
هوج المشاربه تسري جوف عرق الدّم
يالعنبو بعضها ضاقت بها بلادي
إن قلت (جابه) يضيق الكون وأتندم
وإن طال صمتي ينادي منهم منادي
ولو تبني بروج قالوا ودّنا نهدم
هدم البروج الشوامخ عندهم عادي
وش نيّة الوقت يوم أن المدى مظلم
والعاصفة وش تبي دام البحر هادي
يعزّ ليل الهجاد الفارس الملهم
ويستنجد الصبح من بات الخلا غادي