نهار العيد

مطلق القعيمه والشعر.. وهذه العذبه الرائعة «نهار العيد» فإليكم الشعر:
لا تفارقني نهار العيد يا ناوي بعاد
خلها بعدين ماودي تجي فرقاك عيد
أدري ان ماضي وصالك بين جورك والعناد
بس جورك والعناد أهون من الفرقا وكيد
وفرحة الميسور لا حقق من أطماعه مراد
ما تساوي فرحة المحروم بالشي الزهيد
لا تروح ولو تروح اليوم وش لي بالقعاد
ديرة ما تجمع الخلان ما فيها جديد
بابتعد مثلك ولو ما عاد تجمعنا بلاد
يكفي ان لسان ذاكرنا يقول إنا بعيد
لا تغرك هالوجيه اللي معي كثر الجراد
يالضيمر الحي تكفى لا تخليني وحيد
لا تخليني تراهم والخلا والإنفراد
كلهم عندي سوى لا قلت وينك يالعضيد
النفوس اللي تكن الغيض وتحسد العباد
عشت فيهم قبل أعرفك سبعة أعوام أو تزيد
سبعة أعوام ولنا فيهم بياض في سواد
وأبتسم وأكذب على نفسي وأقول إني سعيد
كيف تتركني بعد ذيك المحبة والوداد
ما تهون العشرة إلا عند قلب من حديد
أشتكي لك منك وابذل كل حيله واجتهاد
ويمكن الحيله تفيد ويمكن انها ما تفيد
وأدري ان محد يردك عن هقاويك الجداد
بس رايٍ يرفض فراقك هو الراي السديد