نادر الوصف

الصبح طوّل وهمي دق لي صدره
بالغصب والطيب خاويته وخاواني
دام الحشا منحرم من نوره وبدره
وش لون الوم الظلام اللي تغشاني
يا نادر الوصف يالأندر من الندرة
ياصبحي اللي تنفسته وصحّاني
لا تنكر الحزن شف دمعتك منحدرة
خل المكابر ترى عمر الجفا فاني
ما دام مالك على طول الجفا قدرة
وش بك تهدد.. تقاطعني وتنساني
واللي يداريك ياخدر العيون إدره
ترى الزمن ينصف المجني من الجاني
مازال للحب سدرة عش بهالسدرة
وإنعم بظل الغصون الوارف الحاني
دم الوفا محصن ولا ينفعك هدره
لا تقتله عمد وتعوّد تحداني
طعن الهوى خنجره ما أقوى على غدره
خلّه لعذالي اللي عنك ينهاني
أودعت سر الغلا بعيونك الخدرة
لا تترك الدمع يكشفني لعدواني
قلبٍ سما بك غلا.. حافظ على قدره
من حطك الأول اصحى تحطه الثاني
وان كان مالك على طول الجفا قدرة
عوّد لدرب الوفا والود تلقاني