يا صباح الفل

حييت يا لوجه الصبوح
اسعد الله خدك الورد واسعد طلته
ياشذى زهرٍ عبيره مع النسمة يفوح
يابعد روحي ترى البعد نفسي ملته
جيتني وانا اسهر الليل ياعمري وانوح
المآسي بعد فرقاك قلبي تلته
يا هلا بك والمواصل برى كل الجروح
ما كأن الدمع ليلة عيوني هلته
ضاربٍ حبك بالاعماق ما يرضى النزوح
في ظلاله ما تهنى سواي بغلته
خافقي لك روضٍ اخضر وتكفى لا تروح
للغلا فنجال تستاهله من دلته
اقترب سولف عن الشوق واهمس لي وبوح
(طين بعدك) زاد لهفة حنيني بلته
نور خدك كنه البرق بالعتمة يلوح
والشعر متلاطم الموج تدهش فلته
العيون السود تأسر مع الطبع المزوح
والوفا قدرك بها القلب عندي علته
من يحبك لو عطاك الدرر يبقى شحوح
ومن فؤادك يعشقه دنيته ما ذلته
لا تعذر عن غيابك ترى قلبي سموح
وانت مثلك ياهوى البال تدمح زلته
انت ترخص لك حياتي لأنك لي طموح
رغم سيف ايامي السود دونك سلته