وضح تلالا

ابكار كله واكبره ام ثاني
لاشافها راع النضر ما تعداه
وقف ودقق به بكل العياني
الله عليها يوم اوصف حلاياه
يطرب لها قلبي ويطرب لساني
وضحً تلالا من وضاحه ملالاه
لون وبرتها كنها قحوياني
واليامشت سندا وهزعً مقفاه
وراسً كبير فيه كل المعاني
خدً عريضً والمشارب مدلاه
مثل السفايف فوق حرًعماني
وتقويست العرنون كنك تحلاه
مثل الاهله اوحجاج العياني
اما الاذاني خرع كنه مخباه
مكانها ماهو مكان الاذاني
وارقابها مثل السيوف المحناه
منطلقةً ماتشبه الا السناني
وسنامها متفهقً في مقفاه
مثل الرجم مبني عليها وباني
وجنب طويله والغوارب طويلاه
وارهاف لو انه سمانً سماني
واليا سرحت متجهةً يم مفلاه
مشيت عساكر من مكان لمكاني
واليا رفضت مثل الخيام المبناه
ولا روحت سيلً حدر مع طماني
وحليبها للي لفانا حلبناه
ماتفشلك لاجاك رجال عاني
وام الحواره كنها تقول حياه
ابشر بدري بس وقف وزاني
البل عطايا الله ولابه مرواه
من خلقت الدنيا ليا اتلى الزماني
الله ذكرها قبل ذكر السموات
والارض ياللي حافظً للبياني
نبي نتونس دام للعمر لذاه
والعمر تنقص منه حتى الثواني
والادمي له عمر محدود لاجاه
فاني وكل مخلوق لابد فاني
نبي الوناسه دام نقدر ونقواه
والا النكد لاجاك يجيك عاني
ماتنفعك قوه ولاينفعك جاه
والله يستر من صدوف الزماني
واليا حدانا الوقت حدن على اقصاه
فكرت وش عندي ذكرت المقاني
وعزلت لي ماسد منها وبعناه
شيكً مصدق راس ماله ضماني
- نايل الرباح