حلول اللغز

نشرنا في عدد الاسبوع الماضي لغز كتبه الشاعر محمد بن مرشد التميمي وكان نصه:
الا يا ويش بنت لا تركها صاحبه له شأن
بوقت الخير تشفع له وتاقف بالخطا ضده
وهي وقت الطلب تعطي دلايلها بلا برهان
تدوم ولا يغيرها الزمن لو طالت المدة
وقد جاءت الحلول الصحيحة كما يلي:
عبر صفحة تراث بعيدنا ابارك من الوجدان
لقايدنا فهد يا الله عساه بعونه يمده
وابومتعب ابارك له بعيد الفطر مع سلطان
وكل الشعب ابارك له من الخفجي الى جدة
بعد ذا يالتميمي دوك حل اللغز يومه بان
واظنك تقصد البصمة تراها هانت الشده
عطا الله بن سليمان العطا الله
الزلفي
أهنيكم بعيد الفطر عبر تراثنا يا أخوان
عسى المولى يعيده للوطن بالخير ويرده
وحل اللغز ما يصعب على اللي يفهم القيفان
تراها بصمة ابن آدم مكانه في طرف يده
حمود بن مطلق اللحيدان
حائل
اشوف الحظ يعاندني وأنا راضي ولا زعلان
على ما قيل مثل السين بين الدال والشده
صحيح ان البصمات بعملها تثبت البرهان
وكل في بصماته دريكٍ رغم ابو جده
خليف الحربي
الرياض
ألا يا مرحبا بك عد ما هل المطر هتان
وعدد ما أقبل مرخ يمشي وسمنان امتلا سده
كتبت اللغز يا محمد وصغته بأحسن الأوزان
وحله عندنا البصمة وكلٍ يبصم بيده
عبدالله حمد البدر
الزلفي
توكلنا على المعبود يوم اللغز حله بان
إله نستعينه في سنين الخير والشده
تدين البصمة المجرم ترى لو حاول النكران
بعد شاف الحقايق والادلة كلها ضده
محمد بن هذال البريك
اتصالات الرياض
مثل ما للبحر هيبة,, وله بذل,, وعطا,, واحسان
ترى للشعر موروثٍ كما غيث الحيا مده
يسافر به على ضو القمر,, ويصافح الأمزان
ويزهم بصمة الإبداع تكسب بالرضا ودّه
فهد الجروان
الزلفي
ألا يا مرحبا بك يا التميمي يا نسل عدنان
قرينا بالجزيرة ما ضمرت وشاقني رده
تراك ان رحت للمسجد تجي من خطوتك ربحان
ولكن بصمته يا صاح لو يخطى فهي ضده
حجي بن سليمان الحجي
الأحساء
الى من الرجاء رز البيارق بالفرح طربان
يسل الياس سيفٍ تاقف القرعة على حده
لون الحظ مالت من سنامه كفة الميزان
تشابه بصمة الكرنيش فالدمام وبجدة
محمد عبدالكريم الغزي
الزلفي
على طاري سواليف الغلا,ز ومسامر الريضان
سريت أشعب ذلول الشوق للي لاعني صده
تباريني عسوس اللوم,, وأزبن في ذرا الرحمن
وأقول الله على اللي بصمته بالخير ممتدة
محمد عبدالله البهال