هرج ليل

عبير بنت أحمد شاعرة رائعة تحمل نصوصها روح الأنثى وعبير الشعر أهدتنا هذا النص العذب:
الحب ماهو هرج ليل، ولاصبح الصبح انفقد
الحب شمعة لجل تضوي دربنا لازم تذوب
صعبة نكون لبعضنا قلبين من دون الجسد
واصعب نكون لغيرنا أجساد من دون القلوب!
ان كنت تتحمل، فأنا مالي على الفرقا جلد
وما فيني اتحمّل لقا بيزيد ل ذنوبي ذنوب
وانا ادري ان ظرفك شديد، وتدري ان ظرفي أشد
بس ليتنا ندري متى تجري على الكيف الهبوب
وإن ماكتب ربي شبيهٍ لي يشيل اسمك ولد
ابطلب الله ينزع الإحساس من قلبي واتوب
أضحك واعلل بالأمل نفسي واتفاءل بعد
بس الحواس الخمس متفقين في حس الشحوب!
وآجامل العالم واعمّر بابتساماتي بلد
ومن شافني ماكن للأحزان في صدري شعوب!
تعبت كني رابطة فالجيد حبلٌ من مسد
ماغير اشيل ف حيرتي واشيل ويّاي الدروب
أهرب من الواقع ومهما قام حظي أو قعد
مالي عن اللي قدّره ربي على روحي هروب
يارب انا كلّي رجا.. ياواحدٍ فردٍ صمد
ألقى مفاتيح الفرج واعتق مساجين الكروب
انا احترقت ووهج شمعة عيني البارح جمد
من وين اجيب لدمعي الجامد دفا حتى يذوب