يا درعنا الضافي على كل ديره

تغيثنا غيثٍ لنا فيه خيره
وتقبل صلاة الصبح في يوم الاثنين
وترسل علينا السيل في كل ديره
وتنبت عشوبٍ تبهج القلب والعين
وفيه ام سالم صوتها دق زيره
ومني سلامٍ لابو متعب ملايين
ابكتبه واروّحه في الجزيره
يا خادم البيتين يا نصرة الدين
محبتك بقلوب شعبك كبيره
يالحاكم العادل عسى عمرك سنين
يا درعنا الضافي على كل ديره
يا رمز الامة انت تاج وعناوين
سيفٍ لحكم الله وعينك بصيره
لك هيبةٍ تدق رووس الشياطين
ومن هيبتك كلٍّ يناظر مسيره
يابالصخى ويابالوفا يا أحمر العين
مدّات ايدينك يا ابو متعب كبيره
نايف ولي عهدك صعاط المجانين
ضد الخساس اهل العلوم الحقيره
قضى على الارهاب وكل الرذيلين
اهل الفتن واهل العلوم الشريره
وسلمان حبّه في قلوب الملايين
أبو فهد رمز الدفاع ووزيره
مرحوم ياللي جا على اكوار ستين
جا من الكويت وسنّع الله مسيره
حرٍ تنهّض وافرح القلب والعين
ومخالبه للصيد دايم شريره
سطى بليلٍ والعرب فيه ممسين
متجندٍ سيفٍ وشلفى سطيره
وارتد حكمه عام تسعه وعشرين
وهو زعيم القوم وأيضاً أميره
وغزا مغازي لفّها يسار ويمين
على الرمك ومكسرات النجيره
وحقن دما كل ا لحضر والبداويين
وحكم بحكم الله وعينه بصيره
شريعةٍ غرّاء على منهج الدين
وبالسيف أبو تركي بيمنى يديره
عبدالعزيز اذهب اهل الشرك والشين
وعزّ الرجال اهل الشرف والعشيره
وصلاة ربي عد من قالوا آمين
واعداد عقب السيل نبت البذيره
الشاعر/ إبراهيم بن ناصر بن زامل آل حوشان