محاورة الأسبوع

هذه المحاورة جرت بين الشاعرين الكبيرين حمد العبدالرحمن المغيولي والشاعر عبدالعزيز المقحم الملقب بسهيل رحمهما الله.
حمد:
تراني بالنيابة لا تقولون ابن بادي مات
متى ما غاب نجم من الزواهر بين الثاني
ولا نيب الوحيد اللي بداله ينطح اللقوات
وراه رجال ينحون الضديد وتكرم العاني
سهيل:
ألا يا مرحبا بك يالمسلم وارفع الأصوات
عسى الله يرحم اللي مات قول القلب ولساني
صواديف الليالي جت مع الروحات والجيات
وابزهد في حياتي عقب موت فلان وفلاني
حمد:
عسى فيك البقا والميت يسكن بارد الجنات
وأنا وياك صرنا في عيون الناس نيشاني
مقادير الليالي تفقد الطرقي من اللذات
بعد طاحت ذلوله طاح حظه ما انقضى شاني
***
سهيل:
عيون الناس في عام مضى قد هلت العبرات
وأنا مانيب أقوله قايله حضراً وبدواني
تسمع للسوالف يا حمد خذ العلوم وهات
ولا ظنيت انا بلقاك بالدنيا وتلقاني
***
حمد:
أنا وياك يا سهيل النجوم مضيّع الهقوات
نبي نسري تحت نور القمر والدرب سلطاني
إلى منك بغيت العلم شغل جيد الموجات
والى من قر ميزانك معي لك قر ميزاني
***
سهيل:
لعل الظن يصدق في يارجال والهقوات
نبي لعب مشكل والعلوم اشكال والواني
ترى راع الورق يعجز يصن أنكان ماجا الزات
ولا شفت الورق بالملعبه نسفت ذرعاني
***
حمد:
لعل الوادي اللي سال سيله يسقي التنهات
أنا خيلت لي برق سرى في غر الامزاني
أنا خابرك يا تاجر ملي والشيك بالمخبات
وأنا من حمد ربي ميسر والبوك ملياني
***
سهيل:
عسى المقبل يجي وانكان جانا فبرك الساعات
ولا به نار شبت ما يجي للنار دخاني
توصيني وانا بالملعبه قد خذت منها وصات
وانا جدي على ملي الشعر باللعب وصاني