رمح ذياب

أنا البارحة ما أمسيت والنوم لي ما طاب
وهواجيس قلبي عابرات طوارقها
على بو عيون لاخزرني تقول حراب
صواريخ جو كبتن الميغ مطلقها
رماني بها واعدم ضلوع الحشا وانصاب
وكسر صناديق المعاليق واخفقها
عيون بها سيف الزناتي ورمح ذياب
وجموع تشيل سيوفها مع بيارقها
يقولون قلبك من طروق الهوى ماتاب
نشوفك بعد تنخي المحبة وتعشقها
وأنا اقول قلبي من جروح الهوى ما طاب
ولا تسلم قلوب هوى البيض عايقها
مريض الهوى يحتار وتحير به الاطباب
ولو رحلوه لغرب الامة ومشرقها
وانا يا عنود الصيد قلبي بحبك ذاب
وروحي تمنى شوفتك وانت ما حقها
نسيت المحب اللي يحبك بدون اسباب
ويا شين ساق مشيها ما يوافقها
إذا كان في حبك خيال وفيه كذاب
فلا كل من تظهر غلانا نصدقها