ظبيّْ البراح

يا طير يا طير يا طير السعد ياللي تهز الجناح
لا واهنيك إلى ضاقت عليك الارض خلّيتها
وإن رحت وإن جيت يا طير السعد تسبق هبوب الرياح
وأظن ما فيه ديره فوق وجه الارض ماجيتها
ما انته بمثلي تجي وتروح ما يصعب عليك المراح
لكنْ يا ليت جنحاتك معي يا طير ياليتها
كلّه علشان أزور اللي رماني في العنا واستراح
اللي على شانه الأقدام عنّتني وعنّيتها
في ماض الأيام أشوفه قدم عيني في المسا والصباح
واليوم حتى العلوم اللي تجيني عنه ما اوحيتها
وليا نشدت العرب محدٍ يعلمني عنه وين راح
وأتعبت نفسي وبالنشده كثير الناس بذّيتها
لاوا وجودي على شوفتك مرّه يا ظبيّْ البراح
ياللي على شانك العبره على الخدين هلّيتها
يا بوعيونٍ هدبها يزرق العشّاق زرق الرماح
ذبحت روحي على كفك برمش العين واحييتها
الشاعر/ حبيب العازمي