مير القدر ما للفتى عن وقوعه

مرثية في محمد بن ضيف الله بن مناحي الثبيتي
واطيري اللي مكرمة من طلوعه
مرهن سبوقه واترقب هداده
جاته صدوف لاعت القلب لوعه
واطيري اللي من طيور السعادة
قلبي تصرّم من معالي ضلوعه
يوم ما غيره يجي لي سداده
النبت واحد مير تفرق فروعه
غصن عدل كل يشوف اعتماده
وغصن عوج وتشوف تبدي فلوعه
ما ينقضب باليد ولا من جواده
ما مثل طيري في وصوفه ونوعه
حر صغير وماهر بالصياده
يا بعد طلعاته وما احلى طبوعه
كل العرب تشهد وتدي الشهادة
العين تدمع والضماير خشوعه
وكل نثر من دمع عينه زياده
تبكي على اللي نافل بالمطوعه
والامر للي رايح في مراده
ومن صار عاقل صار نفسه قنوعه
يرضى بحكم اللي يدبر عباده
والنفس للمطلوب دايم هلوعه
والشر ما ترضاه ترغب حياده
مير القدر ما للفتى عن وقوعه
ياكم عقيد حوله عن شداده
وياكم فرق من غالي من ربوعه
وياكم اخذ من حاكم من بلاده
ضيف الله بن مناحي بن ضيف الله الثبيتي (الداهنة)