الجرح ينزف

كلٍ مصيره للثرى شيء ماكود
كلٍ يموت ومفرشه خام وتراب
كلٍ يزول ومابها شي ماجود
ماتوا لنا يا مامن أقراب وأصحاب
كلٍ على هل الارض لابد مفقود
ياما بكينا والبكا ماله حساب
مير البكا لاشك ماعاد به فود
هذا القدر لابد للكل طلاب
كلٍ يموت وعمره اليوم محدود
موتة فهد سلمان شيء من الصعاب
موته علينا صار نقصٍ بلا زود
الجرح ينزف عقب فرقاه ماطاب
والعين تبكي كن في جفنها عود
دمع نثرته والحشا صار منصاب
يافهد بن سلمان يامنبع الجود
بقلوبنا يافهد ذكراك ماغاب
طيبك وذكرك يابن سلمان موجود
تعطي وتوهب بلا ذكر وحساب
دايم عطاكم دوم ماله حدود
يبكي عليك الجار من ضمن الاحباب
أيامنا يافهد في غيبتك سود
يالله عسى في جنة الخلد له باب
في جنة الفردوس والطلح منضود
الشاعرة أوامر الرياض