صدى الترحيب

حاولت في جبره ولازان جبره
جبره وكسره عند وحده من الحور
اللي عليها طال هجره وصبره
في حبها قانع ومغرم ومجبور
ومن حبها في داخل الصدر عبره
ان جيتها يجذبني حساس وشعور
اسمع صدى الترحيب في كل نبره
وان رحت عنها كن في الحاش تنور
مثل الذي ما باقي غير قبره
ليا ذكرت فراقها طحت مقهور
يدق في قلبي مثل دق الابره
أسهر من المغرب الى طلعة النور
كسبت من سهر أسمر الليل خبره
لا أقبل ظلام الليل جاء للشعر دور
على الورق راس القلم سال حبره
يا صاحبي لا تعلن الهجر والجور
اللي بوسط القلب شيء تخبره
غلاك ما بين المعاليق معمور
ما ينتوصف شان حبك وكبره
لاتحسبني يوم قفيت مسرور
مالي على ما دبر الله دبره
قلبي يبيك وخاطري منك مكسور
والمشكلة كانه قصر عنك شبره
شبيب شاهر السبيعي